📢ព័ត៌មានលម្អិត ជុំវិញករណីបុរសជាមេធាវី បាញ់សម្លាប់សង្សារបស់ខ្លួន រួចបាញ់សម្លាប់ខ្លួនឯងតាមក្រោយ នៅសង្កាត់ភ្នំពេញថ្មី ខណ្ឌសែនសុខ.!

ភ្នំពេញ៖ កាលពីវេលាម៉ោង ៨និង៤៦នាទីយប់ ថ្ងៃទី៨ ខែកុម្ភៈ ឆ្នាំ២០២៤ នារីម្នាក់ដែលជាអ្នករកស៊ីលក់អនឡាញ ត្រូវបុរសជាសង្សា មានតួនាទីជាមេធាវី បាញ់សម្លាប់ រួចបាញ់ខ្លួនឯងតាមក្រោយ ស្ថិតនៅទល់មុខច្រកចេញចូលបុរីប៉េងហួតដឺស្តារឡៃតិ៍ លើកំណាត់ផ្លូវលេខ១៩៦៦ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

សូមជម្រាបថា បុរសជាជនបង្កមានឈ្មោះ ទូច វឌ្ឍនៈ អាយុ ៣២ឆ្នាំ ជាមេធាវី  រីឯនារីរងគ្រោះឈ្មោះ អែម សុវីដេត អាយុ ២៦ឆ្នាំ មុខរបលក់អនឡាញ។

នៅមុនពេលកើតហេតុ គេបានឃើញរថយន្តចំនួន ២គ្រឿង បានបើកបរមកដល់ចំណុចច្រកចេញចូលបុរីប៉េងហួង ដោយរថយន្តខាងមុខ ជារថយន្តស្ត្រីរងគ្រោះ ដែលមានម៉ាក FORD ECOSPORT ពណ៌ស ពាក់ស្លាកលេខ ភ្នំពេញ 2AR-4896 បើកបរដោយនារីរងគ្រោះ និងរួមដំណើរជាមួយម្តាយ គោលបំណងបត់ចូលបុរី។ 

ពេលបើកមកដល់ចំណុចច្រកចូល ស្រាប់តែមានរថយន្តពណ៌ខ្មៅ១គ្រឿង ដែលមានម៉ាក MG ពាក់ស្លាកលេខ ភ្នំពេញ 2BS-8007 បើកបរដោយជនបង្ក មានឈ្មោះ ទូច វឌ្ឍនៈ មុខរបរជាមេធាវី បានបើកមកពាំងមិនឱ្យរថយន្តរបស់ស្ត្រីរងគ្រោះបានចូលបុរីនោះទេ។

បន្ទាប់ពីមិនបានបត់ចូលបុរី ស្ត្រីរងគ្រោះបានអែបរថយន្តទៅកៀនទល់មុខមន្ទីរពេទ្យមួយកន្លែង រួចបើកទ្វារចុះពីលើ       រថយន្ត ខណៈជនបង្កបានចុះពីលើរថយន្តដូចគ្នា រួចធ្វើសកម្មភាព ដកកាំភ្លើងខ្លី១ដើម បាញ់ក្បាលរបស់ស្ត្រីរងគ្រោះ       បណ្តាលឲ្យស្ត្រីរងគ្រោះដួលដាច់ផ្ងារ រួចជនបង្កបានបន្តតម្រង់ក្បាលស្ត្រីរងគ្រោះចំនួន១គ្រាប់ទៀត ដើម្បីផ្តាច់ជីវិត បន្ទាប់ពីបាញ់រួច ជនបង្កក៏បានធ្វើសកម្មភាពបាញ់សម្លាប់ខ្លួនតែម្តង ដោយមិនដឹងមូលហេតុច្បាស់ថាមកពីអ្វីនោះទេ។

ប្រភពព័ត៌មានពីបណ្តាញសង្គមតេលេក្រាម គេបានបង្ហោះឯកសារមួយចំនួនពាក់ព័ន្ធនឹងសាច់រឿងរបស់ស្ត្រីរងគ្រោះ និងបុរសជនបង្ក ដោយអ្នកទាំងពីរធ្លាប់មានទំនាក់ទំនងមនោសញ្ចេតនាជិតស្និតកន្លងមក តាំងពីឆ្នាំ២០២២ តែដោយសារស្ត្រីរងគ្រោះដឹងថាបុរសជនបង្កមានភរិយា ទើបដកខ្លួនចេញ ដោយធ្វើលិខិតព្រមព្រាងជាលាយលក្ខអក្សរត្រឹមត្រូវ។ ប៉ុន្តែបន្ទាប់ពីការបញ្ចប់ទំនាក់ទំនងនេះរួចមក ភាគីខាងបុរសមិនទាន់អស់ចិត្ត នៅតែតាមស្ត្រីរងគ្រោះ រហូតឈានដល់ការទាស់សម្តីគ្នា។ ដល់យប់ថ្ងៃកើតហេតុ ជនបង្កបានតាមស្ត្រីរងគ្រោះរហូតមកដល់ច្រកចូលបុរី ហើយធ្វើសកម្មភាពបាញ់សម្លាប់ស្ត្រីខាងលើតែម្តង។

បន្ទាប់ពីកើតហេតុ ក្រុមគ្រួសារជនបង្កបានសុំឱ្យរថយន្តសាម៉ុយបញ្ជូនជនបង្កទៅមន្ទីរពេទ្យ ដើម្បីសង្គ្រោះបន្ទាន់ព្រោះនៅមានដង្ហើម តែជាអកុសលជនបង្កបានស្លាប់នៅពេទ្យ។ ចំណែកសពស្ត្រីរងគ្រោះត្រូវបានសមត្ថកិច្ចជំនាញធ្វើការរុំថង់ប្លាស្ទិក រួចដាក់ចូលក្នុងរថយន្តរបស់មន្ត្រីជំនាញផ្នែកកោសល្យវិច្ច័យ ដើម្បីត្រួតពិនិត្យ និងសើបសួរព័ត៌មានបន្ថែមជុំវិញករណីបាញ់សម្លាប់នេះ មុនប្រគល់ជូនក្រុមគ្រួសារ៕