ខេត្តកណ្តាល ៖ ឯកឧត្តម គង់ សោភ័ណ្ឌ អភិបាល នៃគណ:អភិបាលខេត្តកណ្ដាល និងលោកជំទាវ ថេង ពុទ្ធិតា បានអញ្ជើញចូលរួមក្នុងពិធីបិទការប្រណាំងទូក ដើម្បីអបអរសាទរព្រះរាជពិធីបុណ្យអុំទូក អកអំបុក សំពះព្រះខែ និងបណ្ដែតប្រទីប ក្រោមអធិបតីភាពដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហរិញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល ស្ថិតនៅសួនច្បារមាត់ទន្លេរបាសាក់ ក្រុងតាខ្មៅ ខេត្តកណ្ដាល។
![](http://www.santepheappit.com/wp-content/uploads/2023/10/Picsart_23-10-29_20-43-49-263-1024x1024.jpg)
“ការប្រណាំងទូក នៅក្រុងតាខ្មៅ ដែលប្រព្រឹត្តិទៅអស់រយៈពេល ១ថ្ងៃពេញ បានធ្វើឡើងដោយរលូនល្អ និងប្រកបដោយភាពជោគជ័យ ជាមួយនឹងស្នូរសម្លេងសប្បាយរីករាយ ហ៊ោរកញ្ច្រាវពីសំណាក់ប្រជាពលរដ្ឋ និងក្រុមកីឡាករចំណុះទូក ក្រោមម្លប់សន្តិភាព”។
![](http://www.santepheappit.com/wp-content/uploads/2023/10/Picsart_23-10-29_20-44-49-979-1-1024x1024.jpg)
សូមជម្រាបជូនថា ទូកដែលចូលរួមប្រណាំងមានចំនួន ៧៤ទូក ក្នុងនោះមានទូកខ្នាតអន្តរជាតិនារី ចំនួន ០២ទូក, ទូកខ្នាតអន្តរជាតិបុរស ចំនួន៣២ទូក, ទូកអុំបុរស ចំនួន ៣៥ទូក និងទូកចែវបុរស ចំនួន ០៥ទូក សរុបកម្លាំងអ៊ុំចំនួន ៤,១៥២នាក់។
![](http://www.santepheappit.com/wp-content/uploads/2023/10/Picsart_23-10-29_20-45-42-800-1024x1024.jpg)
«ខ្ញុំសូមគោរពថ្លែងអំណរគុណបំណាច់ដ៏ធំធេងរបស់ សម្ដេចអគ្គមហាសេនាបតីតេជោ ហ៊ុន សែន និងសម្ដេចមហាបវរធិបតី ហ៊ុ ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលខិតខំកសាងប្រទេសជាតិ និងដឹកនាំឱ្យកាន់តែរីកចម្រើនឡើងទៅមុខជាលំដាប់ និងជាពិសេស ខ្ញុំសូមគោរពថ្លែងអំគុណយ៉ាងជ្រាលជ្រៅ ជូនចំពោះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហរិញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល ដែលបានផ្តួចផ្តើមគំនិត និងគាំទ្រដល់ដំណើរការ នៃការរៀបចំពីធីអុំទូក និងបានផ្តល់កិត្តិយសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រណាំងទូក នៅក្រុងតាខ្មៅ ខេត្តកណ្តាល នាពេលនេះ ព្រមទាំងបានឧបត្ថម្ភដល់ទូក ដែលបានចូលរួមក្នុងប្រណាំងទូក ទាំង៧៤ទូក រួមមាន៖ ទូកអុំ ៣៤ទូក, ទូកចែវ ៥ទូក, ទូកអន្តរជាតិ ៣៥ទូកផងដែរ»។
![](http://www.santepheappit.com/wp-content/uploads/2023/10/Picsart_23-10-29_20-50-11-233-1024x1024.jpg)
ដោយឃើញប្រជាពលរដ្ឋពិតជាមានភាពរីករាយណាស់ ដូច នេះដើម្បីញ៉ាំងឱ្យកាន់អធិកអធ័មឡើង និងជាការលើកទឹកចិត្តផងនោះ ខ្ញុំសូមឧបត្ថម្ភបន្ថែមទៅលើកីឡាករអុំទូក ដើម្បីជាការលើកទឹកចិត្តដល់អ្នកផ្ទះរបស់កីឡាករផងដែរ។ បានឧបត្ថម្ភគាំទ្រដល់កីឡាករដែលចូលរួមទាំងអស់ ចំនួន៤,១៥២នាក់ ក្នុងម្នាក់ៗទទួលបាន៖ អង្ករ ២០គីឡូក្រាម, មី១កេស, ត្រីខ១យួរ, សារុង១ និងថវិកាចំនួន ៥០,០០០ម៉ឺនរៀល។
![](http://www.santepheappit.com/wp-content/uploads/2023/10/Picsart_23-10-29_21-13-05-971-1024x683.jpg)
![](http://www.santepheappit.com/wp-content/uploads/2023/10/Picsart_23-10-29_20-47-54-083-1024x1024.jpg)
![](http://www.santepheappit.com/wp-content/uploads/2023/10/Picsart_23-10-29_20-49-07-547-1024x1024.jpg)