ព្រះសីហនុ: រថយន្តមួយគ្រឿងបើកក្រឡាប់ធ្លាក់ផ្លូវខ្លួនឯង បណ្ដាលអោយបុរសជនជាតិចិនជាអ្នកបើកបររថយន្ដ ស្លាប់និងស្ត្រីម្នាក់ទៀតបានរងរបួសធ្ងន់ លើផ្លូវល្បឿនលឿន ភ្នំពេញ ខេត្តព្រះសីហនុ ត្រង់ចន្លោះគីឡូម៉ែត្រលេខ ១៣៤ – ១៣៥ ក្នុងភូមិស្ទឹងឆាយ ឃុំស្ទឹងឆាយ ស្រុក កំពង់សិលា ខេត្តព្រះសីហនុ កាលពីរសៀលថ្ងៃទី ១៩ខែកុម្ភៈឆ្នាំ២០២៣។
មន្ត្រីអាជ្ញាធរមូលដ្ឋាន ឃុំស្ទឹងឆាយ បានឱ្យដឹងថា រថយន្តឡង់គ្រីសរ័ មួយគ្រឿងពណ៌ខ្មៅ ពាក់ស្លាកលេខ ភ្នំពេញ2AX1188 ធ្វើដំណើរពីភ្នំពេញ ឆ្ពោះមកក្រុងព្រះសីហនុ ក្នុងល្បឿនលឿន! លុះមកដល់ចំណុចកើតហេតុបានផ្ទុះកង់ក្រោយ បណ្ដាលឲ្យរថយន្ដក្រឡាប់ធ្លាក់ផ្លូវតែម្តង។
ភ្លាមៗនោះដែរ រថយន្តសង្គ្រោះរបស់មណ្ឌលសុខាភាព តក្កវិទ ស្រុកកំពង់សិលាបាន ចេញធ្វើសកម្មភាពជួយសង្គ្រោះ ជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែកខេត្តព្រះសីហនុ និងបានដឹកសាកសព យកទៅរក្សាទុក ដើម្បីប្រគល់ជូនស្ថានទូតចាត់ចែងបន្ត។
ចំពោះអត្តសញ្ញាណជនរងគ្រោះ ឈ្មោះTANG SHUMING ភេទប្រុស អាយុ52ឆ្នាំ ជនជាតិចិន ជាអ្នកបើកបររថយន្ត និងមានអ្នករួមដំណើរក្រៅពីអ្នកបើកបរចំនួន ០៣នាក់ទៀត ស្រី ០១នាក់ ប្រុស0២នាក់ (សរុបទាំងអស់4នាក់ )៕