ថ្ងៃអាទិត្យ ០៩រោច ខែបុស្ស ឆ្នាំខាល ចត្វាស័ក
ពុទ្ធសករាជ ២៥៦៦ , ត្រូវនឹងថ្ងៃទី១៥ ខែមករា ឆ្នាំ២០២៣
(ត្បូងឃ្មុំ)៖ ដោយសារតែភ្លើងប្រច័ណ្ឌបណ្តាលឱ្យស្រ្តីវ័យ ៣០ ឆ្នាំម្នាក់ បានដេញកាប់ស្រ្តីជាម្តាយនិងកូនប្រុសឲ្យរងរបួស រត់ឆ្លងថ្នល់ ប៉ុន្តែចៃដន្យអ្នកដែលដេញតាមកាប់គេពីខាងក្រោយ ត្រូវរថយន្តធុនធំបុកស្លាប់ យ៉ាងអាណោចអាធ័ម កាលពីម៉ោងប្រមាណជា៧:១៥ ព្រឹក ថ្ងៃទី១៤ មករា។
ហេតុការណ៍ដេញកាប់គ្នាត្រូវរថយន្តបុកស្លាប់នេះ នៅលើកំណាត់ផ្លូវជាតិលេខ ៧ ចន្លោះបង្គោលគីឡូម៉ែត្រលេខ ២០៧-២០៨ ស្ថិតក្នុងភូមិសង្គមមានជ័យចាស់ ឃុំមេមត់ ស្រុក មេមត់។ ប្រភពពីមន្រ្តីនគរបាលស្រុកមេមត់បានឱ្យដឹងថាៈ ស្រ្តីជាអ្នកស្លាប់ឈ្មោះ ប៉ូ សុខគា អាយុ ៣០ ឆ្នាំមានទីលំនៅភូមិមេមត់ផ្សារ ឃុំមេមត់ ស្រុកមេមត់។ ចំណែកខាងអ្នកបើកបររថយន្ត ឈ្មោះ ជា ជាតិ ភេទប្រុស អាយុ ២៧ ឆ្នាំ រស់នៅភូមិស្វាយព្រៃ ឃុំទ័ពមាន ស្រុកថ្កង ខេត្តកំពង់ស្ពឺ។
បើករថយន្តម៉ាក់ ហ៊ីយ៉ាន់ដាយ ពណ៌ស ពាក់ស្លាកលេខកំពង់ចាម3B-0007 សណ្តោងរ៉ឺមកពណ៌ខៀវ លេខកំពង់ចាម4A-1177 ។
ប្រភពដដែលបានបន្តថាៈ នៅមុនកើតហេតុស្រ្តីឈ្មោះ ប៉ូ សុខគា បានធ្វើសកម្មភាពកាប់លើម្តាយនិងកូនប្រុស ឲ្យរងរបួស ។ ចំណែកម្តាយនិងកូន ដោយភ័យខ្លាច បានរត់ឆ្លងថ្នល់ទៅម្ខាង ដើម្បីគេចពីស្ត្រីកំណាចដែលបានកាប់នោះ ហើយស្រ្តីនោះនៅតែតាមដេញកាប់បន្តទៀត ប៉ុន្តែចៃដន្យពេលកំពុងរត់ឆ្លងថ្នល់ដេញកាប់គេ ក៏ត្រូវរថយន្តខាងលើបុក និងកិនពេញទំហឹង បណ្តាលដាច់ដៃម្ខាង ស្លាប់នៅនឹងកន្លែង។
ជុំវិញករណីនេះលោកវរសេនីយ៍ឯក ហុង គឹមហឿន អធិការនគរបាលស្រុកមេមត់ បានប្រាប់ថាៈ បញ្ហានេះផ្តើមចេញពីការប្រច័ណ្ឌ តែខាងលោកមិនទាន់ស៊ីជម្រៅលើករណីនេះទេ គឺខាងជំនាញព្រហ្មទណ្ឌកំពុងធ្វើការស៊ើបអង្កេត លទ្ធផលយ៉ាងណានឹងជម្រាបជូនតាមក្រោយ៕
